Hið árlega jólaföndur verður haldið í Grunnskólanum á Þingeyri sunnudaginn 2. desember kl. 16:00-19:00.

Laufabrauðið verður á sínum stað og kostar 150 kr. stk. En að lágmarki eru seld 5 stk. Sniðugt föndur verður til sölu (verð frá 500 kr. – 1500 kr.)

Minnum á að gott er að taka með sér hnífa og laufabrauðsjárn til að skera laufabrauðið. Penslar og málning verða á staðnum en fínt fyrir þá sem eiga að taka þá með.

8.-9. bekkur verður með veitingar til sölu vegna fjáröflunar á skólaferðalagi.

Hlökkum til að sjá ykkur og eiga notalegan dag saman.

Með jólakveðju

Foreldrafélag G.Þ.

Myndvinnsla á yngsta stigi

Heimildarvinna á elsta stigi

Hugstormun á mið stigi

« 1 af 3 »

Í dag miðvikudaginn 14. nóvember hófust þemadagar í skólanum. Hefðbundið skólastarf er brotið upp þessa skóladaga. Þemað á þessu skólaári er “Heimurinn okkar-áhugaverðir staðir”. Yngsta stig vinnur með Ísland, mið stig vinnur með Evrópu og elsta stig Ástralíu. 

Á degi íslenskrar tungu er foreldrum og velunnurum skólans boðið að koma í skólann að sjá afrakstur þema vinnunnar kl. 13-14.

Síðasti danstíminn var í dag en Eva “dans” hefur verið hjá okkur sl. 10 miðvikudaga og kennt öllum hópum dans. Allir nemendur komu fram á skóladanssýningu í dag sem endaði á hópdans nemenda og starfsfólks. Þetta var frábær stund, TAKK Eva og TAKK kæru nemendur fyrir að vera með og hafa gaman af þessu.

Það verða íþróttir á þemadögum, því þarf íþróttataska að fylgja með á fimmtudaginn.

Fyrirlesturinn endaði á "Hjartaleik" til að fá smá gleði í hjartað

Sáttmálinn 2018-19

Öll börn eiga rétt á að vera glöð

« 1 af 3 »

Í gær var dagur gegn einelti. Nemendur og starfsfólk hittust "á sal" í tilefni dagsins. Við sungum saman lagið Undir regnbogann, eftir Ingó en texti lagsins fjallar um að við getum sigrað heiminn og látið drauma okkar ræstast þrátt fyrir að lífið sé stundum grámyglað og erfitt. Fjallað var um leiðir til að fyrirbyggja einelti, ábyrgð okkar og rétt okkar til að fá að vera eins og við erum í friði fyrir öðrum. Það eiga allri rétt á því að líða vel í skólanum. Við töluðum um góðverk og skrifuðum undir skólasáttmála 2018-19 gegn einelti. Við ætlum að leggja áherslu á að sýna góðvild, umhyggju, virðingu og hugrekki. Við ætlum líka að spá í það hver stjórnar okkar hegðun og hvernig við viljum að aðrir muni eftir okkur.

Áætlun gegn einelti var send á alla í tölvupósti og hana má finna hér

Nú er enn ein vikan á enda. Er ekki sagt að tíminn fljúgi þegar gaman sé? Það á svo sannarlega við um okkur. Það er bara alltaf föstudagur!!! :-)

Í nóvember verður mikið um að vera. Má þar nefna foreldraviðtöl, þemadaga og lestrarátak.

Byrjum á foreldraviðtölunum. Þau verða í næstu viku. Umsjónarkennarar opna fyrir skráningar í viðtöl í dag og eru foreldrar hvattir til að bóka sig sem fyrst. 

Þemadagar verða 14. 15. og 16. nóvember þar sem unnið verður að ákveðnu þema í skólanum og verður afraksturinn til sýnis á lokadeginum, þann 16. nóvember sem jafnframt er "dagur íslenskrar tungu". Þá hefst formlega undirbúningur fyrir "Stóru upplestrarkeppnina" sem er ár hvert í 7. bekk.

Lestrarátak verður síðan hjá okkur síðustu tvær vikurnar í nóvember - en við erum jú alltaf að þjálfa lestur alla daga, bæði í skólanum og heima. Því eins og við þreytumst aldrei á að segja: "Lestur er lykillinn"

Eigið góða helgi og njótið þessara dásamlegu vetrardaga sem við erum svo heppin að hafa (enn þá). :-)

Hér hjá okkur í G.Þ. er sjaldan lognmolla, alltaf líf og fjör og nóg að gera.

Í morgun, miðvikudag, fór elsta stigið yfir á Flateyri þar sem elstu stig skólanna á Flateyri, Suðureyri og Þingeyri hlýddu á þá félaga Kjartan Yngva og Snæbjörn segja frá bókaflokknum Þriggja heima sögu, en þar hafa þeir skapað furðuheim skáldsagna sem byggja á gömlum hugmyndum, m.a. úr Norrænni goðafræði. - Þetta er liðurinn "Skáld í skólum" sem er verkefni á landsvísu.

Á morgun, fimmtudag, fer síðan hin árlega Bolungarvíkurhátíð fram, en þar etja kappi unglingastig allra skólanna á norðanverðum Vestfjörðum í alls kyns íþróttagreinum og hafa gaman af.

Miðstig og yngsta stig eiga á meðan "hefðbundna skóladaga" með námi og leik.

Föstudaginn 26. og mánudaginn 29. okt er síðan vetrarfrí hjá okkur og við hittumst aftur hress og endurnærð þriðjudaginn 30. nóvember.

Ég vil nota þetta tækifæri og minna alla á, foreldra jafnt sem nemendur, að mikilvægt er að lesa þó við séum í vetrarfríi. Það gildir alltaf að lesa eigi a.m.k. 15 mín. á dag a.m.k 5 daga vikunnar, hvort sem er hefðbundinn skóladagur, vetrarfrí, jólafrí eða frí vegna ferðalaga. Korter er ekki mikið á dag..........en skiptir svo miklu máli upp á lesturinn í heildarsamhenginu.

Njótið samverunnar yfir löngu helgina,

kv. kennarar og annað starfsfólk G.Þ.

Fundur á morgun "á sal" fyrir áhugasama á öllum aldri!

Íbúafundir vegna endurskoðunar íþrótta- og tómstundastefnu Ísafjarðarbæjar verða haldnir á þremur stöðum klukkan 17 á morgun, þriðjudaginn 16. október. Fundirnir verða í Grunnskólanum á Suðureyri, Grunnskóla Önundarfjarðar og Grunnskólanum á Þingeyri. Gera má ráð fyrir að fundirnir standi í um tvær klukkustundir og eru áhugasamir á öllum aldri boðnir hjartanlega velkomnir til skrafs og ráðagerða.
Sambærilegur fundur verður síðan haldinn á 4. hæð Stjórnsýsluhússins á Ísafirði þriðjudaginn 30. október klukkan 17.

Kjaftað um kynlíf

Í kvöld fimmtudagskvöldið 11. október verður Sigga Dögg kynfræðingur með foreldrafræðslu í Grunnskólanum á Ísafirði (nánari staðsetning: danssalur G.Í.) kl. 20:00-21:30. Foreldrar nemenda í G.Þ. er velkomnir til að sækja fyrirlesturinn. Hér er hægt að fá nánari upplýsngar um fyrirlesturinn. Sigga Dögg mun hitta nemendur á elsta stigi í "litlu" skólunum hér á Þingeyri á morgun 12. október.

Lestu bleika bók í október

Mætum í einhverju bleiku 12. okt.

« 1 af 2 »

Á FÖSTUDAGINN 12. OKTÓBER VILJUM VIÐ VEKJA ATHYGLI Á KONUM MEÐ BRJÓSTAKRABBAMEIN. VIÐ HVETJUM ALLA TIL AÐ SÝNA SAMSTÖÐU OG KOMA Í EINHVERJU BLEIKU Í SKÓLANN.

Við tókum líka saman allar bleiku bækurnar okkar og hvetjum nemendur til að lesa bleika bók í október ef þeim vantar bók til að lesa (sjá mynd)

Lestur er lykillinn

Lesfimi íslenskra skólabarna jókst marktækt milli ára, samkvæmt lesfimiprófi Menntamálastofnunar sem lagt var fyrir nemendur í öllum bekkjum grunnskóla í september sl. Niðurstöðurnar gefa vísbendingar um að aðgerðir til að auka lestrarfærni og áhuga barna skili árangri.

Haustið 2015 gerðu mennta- og menningarmálaráðuneytið og sveitarfélög í landinu með sér svokallaðan Þjóðarsáttmála um læsi. Markmið sáttmálans var að tryggja að öll börn gætu við lok grunnskóla lesið sér til gagns enda þykir sannreynt að lífsgæði og læsi haldist í hendur. Með skipulögðu mati á lesfimi barna á grunnskólaaldri má fylgjast með stöðu og framförum hvers barns, og grípa inn í þar sem þurfa þykir til að styrkja námsstöðu barnsins.