Eftir skóladaginn í dag eru nemendur komnir í páskaleyfi. Við óskum öllum gleðilegra páskahátíðar. Skóli hefst aftur samkvæmt stundaskrá þriðjudaginn 22. apríl. Þá eru ekki nema 6 skóladagar eftir af apríl þar sem sumardagurinn fyrsti er 24. apríl. Það er margt um að vera m.a. munu nemendur í 10. bekk nota þessa síðustu daga aprílmánaðar til að ferðast til Kaupmannahafnar. Á skóladagatalinu (sem má sjá hér til hliðar) má svo sjá nánar skipulagið fyrir maí. Námsmatsdagar hefjast 15. maí og eftir þá er nóg um að vera sem tilheyrir síðustu skóladögum skólaárs.

Lilli og refurinn (mynd: Davíð Davíðsson)

Hérastubbarnir í bakaríinu, bangsamamma og bangsi litli (mynd: Davíð Davíðsson)

Lífið í skóginum (mynd: Davíð Davíðsson)

Afmælisveisla bangsapabba (mynd: Davíð Davíðsson)

« 1 af 4 »

Segja má að árshátíð Grunnskólans á Þingeyri hafi verið alveg keppnis. Nemendur úr öllum námshópum settu upp leiksýninguna Lífið í skóginum ásamt kennurum sínum. Mýs, birnir, íkornar, hundar, elgur og hérar sungu og trölluðu á sviðinu í æðislega félagsheimilinu okkar sem Bubbi Morteins mundi eftir og lofaði í Ísland got talent um daginn. Nemendur sýndu frækna framistöðu og komu sjálfum sér og gestum árshátíðarinnar á óvart. Undirbúningurinn var mikill en vel þess virði eins og sjá mátti á leikmyndinni og búningunum. Eitt af markmiðum skólans er meiri samvinna, ekki aðeins hjá nemendunum heldur líka hjá starfsfólkinu. Þessi vinna hefur sannarlega borgað sig þar sem afraksturinn var hreint frábær sýning sem var sýnd þrisvar. Ekki má heldur gleyma atriði barnanna á Leikskólanum Laufás sem þau sýndu á morgunsýningunni á föstudaginn. Þau smellpössuðu inn í leikmyndina með dýrasöng, gleði og flottum leik. Samvinnan er því einnig á milli skólanna tveggja sem er alveg hreint frábært.

Hlökkum til að sjá ykkur

Nú er nóg um að vera í Grunnskólanum á Þingeyri þar sem nemendur og starfsfólk eru að undirbúa árshátíðina sem verður haldin föstudaginn 4. apríl. Mikil samvinna hefur verið í gangi þar sem nemendur eru að setja upp og æfa eitt leikrit saman í stað þess að hver nemendahópur sé með sitt atriði. "Lífið í skóginum" verður frumsýnt í Félagsheimilinu föstudaginn 4. apríl kl. 10 ásamt atriði frá börnunum í Leikskólanum Laufás. Um kvöldið er 2. sýning sem hefst kl. 19:30. Til þess að gefa fleirum kost á að sjá sýninguna hefur verið bætt við 3. sýningunni laugardaginn 5. apríl kl. 14.

Miðaverð er 1000 kr. fyrir 16 ára og eldri. Frítt er fyrir börn á grunn-,og leikskólaaldri.

"eitthvað blátt á degi einhverfunnar"

Styrktarfélag einhverfra hefur minnt á alþjóðadag einhverfunnar sem hefur verið haldinn 2. apríl undanfarin ár. Blár er einkennislitur einhverfunnar og langar félaginu til að gera eitthvað skemmtilegt í samstarfi við hress og kát skólabörn. Markmiðið er að fá sem flest börn til að mæta bláklædd í skólann/leikskólann þennan ágæta miðvikudag í byrjun apríl. Þar sem við í Grunnskólanum á Þingeyri erum hress og kát skólabörn ætlum við að leggja þessu lið og mæta í einhverju bláu þennan dag, þarf ekki að vera mikið heldur bara eitthvað örlítið blátt.

Nú hafa okkur borist alveg hreint frábærar fréttir. Unglingarnir okkar tóku þetta alla leið og sigruðu sinn riðill núna rétt í þessu í skólahreysti. Stuðningsliðið hvatti þau alla leið og lögðu keppendur sig alla fram og uppskáru þau þennan glæsilega sigur. Við eigum von á frekari fréttum og myndum sem við hendum inn um leið og þær berast. Innilega til hamingu öll sem eitt. 

Flottur hópur

Margt að sjá

« 1 af 2 »

Þá er fjörið byrjað og dagur tvö hafinn hjá unglingastigi í menningar- og keppnisferðinni. Í gær var farið snemma af stað og var stefnan tekin í rólegheitunum á Landnámssetrið í Borgarnesi. Eftir góða og ganglega skoðunarferð var haldið af stað í höfuborgina Reykjavík. Áfram var nóg að gera og endaði dagskráin á því að fara í leikhús á Engla alheimsins. Nú er dagur tvö hafinn og þá er keppnisdagur í skólahreysti. Nemendur hafa verið duglegir að æfa sig og eru því klárir í slaginn og óskum við þeim góðs gengis. Við bíðum eftir frekari fréttum að árangri og setjum það hér inn um leið og fréttir berast. 

"Sundlaugin er þó ekki tæmd en vatnið kólnar með hverjum deginum sem það er rafmagnslaust"

Því miður er sú staða komin upp aftur að loka þurfi sundlauginni aftur um óákveðinn tíma frá og með deginum í dag. Nemendur í 1. og 2. bekk hafa náð að ljúka tveimur vikum af sundnámskeiði sínu. Til að ná fleiri tímum fara nemendur í 1.-4. bekk í sund í stað íþróttatímans fimmtudaginn 20. mars. Þá er ein vika eftir til að uppfylla tímafjölda. Vonum við svo sannarlega að þessi lokun standi ekki yfir í langan tíma.

Þegar nemendur eiga að vera í sundi samkvæmt stundaskrá fást þeir við önnur viðfangsefni í öðrum greinum og nýta tíman jafnvel fyrir árshátíð.

Góðar stundir í „góða" veðrinu.

Rakel María (2.sæti), Ásrós Helga (1.sæti) og Þórður Gunnar (3.sæti)

Sl. föstudagskvöld var lokahátíð Stóru upplestrarkeppninnar í Hömrum á Ísafirði. Ásrós Helga Guðmundsdóttir tók þátt í lokahátíðinni fyrir hönd G.Þ. Auk Grunnskólans á Þingeyri voru upplesarar frá Grunnskólanum á Ísafirði, Grunnskólanum á Suðureyri og Grunnskóla Bolungarvíkur. Lesarar lásu fyrst brot úr barnabókaverðlauna sögunni ,,Ertu Guð, afi?" eftir Þorgrím Þráinsson og fóru með ljóð að eigin vali eftir Guðfinnu Þorsteinsdóttir. Að lokum fóru keppendur með ljóð sem þeir höfðu valið sjálfir.

Lokahátíðin var sérlega skemmtileg og á milli atriða fluttu nemendur úr Tónlistaskóla Ísafjarðar tónlistaratriði. Úrslitin urðu þau að Ásrós Helga sigraði. Í 2. sæti varð Rakel María Björnsdóttir úr G.Í. og í því 3. varð Þórður Gunnar Hafþórsson úr G.Í. Dómarar í ár voru þau Björk Einisdóttir, Ingvar Örn Ákason, Ólafur Örn Ólafsson og Pétur Markan.

Við óskum Ásrósu og öðrum keppendum til hamingju með árangurinn.

Hætt hefur verið við lokun sundlaugarinnar.Umframorka verður ekki veitt að svo stöddu, en fengist hefur undanþága til kaupa á forgangsorku meðan skerðingar standa yfir í þessa tvo mánuði sem til stóð að loka. Skerðingar á umframorku hafa því ekki áhrif á skólastarfið og tíma nemenda í sundlauginni. Við höldum því ótrauð áfram með sundkennslu samkvæmt stundaskrá hjá 5.-10.bekk. 1.-4.bekkur byrjar svo síðasta námskeiðið sitt í næstu viku, mánudaginn 10.mars og höldum við áfram næstu þrjár vikur þar á eftir. Nánar um það í tölvupósti þegar nær dregur.

Góðar stundir & hittumst í sundi

Frá skíðaferð 2013

Nú ætlum við að skella okkur á skíði á miðvikudaginn 19. febrúar, ef veður verður gott. Við ætlum að leggja af stað frá skólanum kl 08:15 og áætluð heimkoma er kl 13:30. Nemendur fá hádegismatinn sinn á skíðasvæðinu áður en haldið verður heim en mikilvægt er að hafa með sér nesti. Nemendur geta haft með sér skíði, bretti, sleða og snjóþotur, eins verður skíðaleiga á staðum. Það er hægt að leiga bæði svigskíði og gönguskíði, leigan á öllum búnaðinum er 1.500 krónur.

Sjoppa Skíðafélags Ísfirðinga verður opin. Þar má kaupa pylsur, grillsamlokur, kakó, kaffi, og alls kyns "óhollustu" - einnig skíðalúffur/hanska, skíðagleraugu og hjálma.

Nú er bara að vona að veðrið haldi sér og við getum endað þessa stuttu skólaviku á skemmtilegri ferð. Minni í leiðinni á vetrarfríið okkar sem er á fimmtudaginn 20.febrúar og föstudaginn 21.febrúar.