Erna Höskuldsdóttir Erna Höskuldsdóttir | mánudagurinn 2. nóvember 2020

Skipulag næstu vikurnar

Hvað er meira smitandi en Covid?
Hvað er meira smitandi en Covid?

Við höfum breytt skipulaginu fyrir alla hópa eftir að reglugerð um hertar aðgerir kom út í gærkveldi. Stundaskráin heldur sér að mestu leyti fyrir yngstu nemendurnar. Stundakrár sem gilda frá 3.-17. nóvember hafa verið sendar í tölvupósti í mentor. 

Grímuskylda er fyrir nemendur í 5.-10. bekk. Vegna fjölda í heimastofu 5. bekkinga geta þeir sleppt grímu í heimastofu þar sem allir geta verið með meira en 2 m á milli sín.

 

6.-10. bekkur þurfa að bera grímu í öllum kennslustundum og mæta þeir ekki í skólann fyrr en kl. 8:50 á morgnanna. Flestir dagar eru styttri en venjulega þar sem ekki er hægt að kenna íþróttir og sund. Allir hópar eru með 3-4x í viku útivist og/eða tómstund í stundatöflu, þá daga verða nemendur að koma klæddir eftir veðri.

Áhugasvið verður öðruvísi þar sem ekki er hægt að blanda nemendum- í staðinn vinna nemendur "heimastofu áhugasviðsverkefni" þ.e. áhugasviðsverkefni sem hægt er að vinna í heimastofu.

 

Minnum einnig á að H.S.V. íþróttir falla niður og það verður ekki félagsmiðstöð þessar vikur.

Erna Höskuldsdóttir Erna Höskuldsdóttir | föstudagurinn 30. október 2020

Takmarkanir á skólastarfi í byrjun nóvember 2020

Ef hver og einn sinnir sóttvörnum gerir sá hinn sami sitt besta
Ef hver og einn sinnir sóttvörnum gerir sá hinn sami sitt besta

Vegna hertra takmarkana þarf að endurskipuleggja kennslustundir allra námshópa. Beðið er eftir minnisblaði frá menntamálaráðherra sem verður leiðbeinandi í þeirri vinnu. 

Helstu takmarkanir nú þegar sem eiga við skólann:

  • að hámarki eru 25 nemendur saman á hverjum tíma í hverju rými ef hægt er að tryggja 2 m regluna
  • Íþróttir óheimilar.
  • Sundlaugum lokað.
  • Sviðslistir óheimilar.
  • Grímuskylda þar sem ekki er unnt að tryggja 2 metra nálægðarmörk milli einstaklinga sem ekki eru í nánum tengslum.
  • Börn fædd 2015 og síðar undanþegin 2 metra reglu, fjöldamörkum og grímuskyldu (gilti áður um börn fædd 2005 og síðar).

Einhverjir nemendur eru búnir að sauma sér fjölnota grímur sem við hvetjum þá til að nota annars verða grímur verða í skólanum fyrir alla. Mikilvægt er að nota andlitsgrímur rétt. Myndband um grímunotkun má sjá hér endilega farið yfir með börnunum hvernig á að nota grímu.

 

Njótið annars löngu helgarinnar.

Gerum okkar besta og hugum vel að sóttvörnum

 

Erna Höskuldsdóttir Erna Höskuldsdóttir | fimmtudagurinn 22. október 2020

Nemendur í G.Þ. fyrstir í gegnum göngin

Mynd frá skóflustungu 2. júní 2010
Mynd frá skóflustungu 2. júní 2010
1 af 4

Það var á góðviðris degi 2. júní 2010 sem nemendur Grunnskólans á Þingeyri héldu upp á vordaginn með skóflur í hönd og áttu frumkvæði af því að taka fystu skóflustunguna að Dýrafjarðargöngum. Eins og segir í bréfi frá samgönguráðherra Sigurði Inga var það framtak aðdáunarvert og til fyrirmyndar.

 

Nemendur hafa síðan fylgst með framkvæmdum og voru m.a. viðstödd hátíðarsprengingu í Arnarfriði fyrir tilstuðlan góðra manna í samfélaginu. Nemendur í 6.-7. bekk skrifuðu ráðherra bréf í janúar sl. og óskuðu eftir því að fá að keyra fyrst í gegnum göngin. Samgönguráðherra í samvinnu við Vegagerðina hafa boðið nemendum að upplifa að fara fyrst í gegnum göngin þegar þau verða opnuð á sunnudaginn 25. október kl. 14. Með í för verður Gunnar Gísli sem hefur séð um mokstur á Hrafnseyrarheiðinni síðan 1974.

 

Það verður rúta fyrir nemendur fyrir utan skólann kl. 13 á sunnudaginn. Við hvetjum nemendur til að mæta og þiggja boðið og skella sér með okkur í sunnudagsbíltúr.

Erna Höskuldsdóttir Erna Höskuldsdóttir | miðvikudagurinn 14. október 2020

Útivistarreglur

Minnum á útivistarreglurnar
Minnum á útivistarreglurnar
Útivist­ar­tími barna og ung­linga styttist í september ár hvert. Frá þeim tíma mega 12 ára börn og yngri vera úti til kl. 20.00. 13 ára til 16 ára ung­ling­ar mega vera úti til kl. 22.00.

Börn mega ekki vera á almannafæri utan fyrrgreinds tíma nema í fylgd með fullorðnum. Reglan á ekki við þegar unglingar eru á heimleið frá viðurkenndri skóla-, íþrótta- eða æskulýðssamkomu. Aldur miðast við fæðingarár.
 

Útivistarreglurnar eru samkvæmt barnaverndarlögum. Þeim er m.a. ætlað að tryggja nægan svefn en hann er börnum og unglingum nauðsynlegur. Svefnþörfin er einstaklingsbundin en þó má ætla að börn og unglingar á grunnskólaaldri þurfi 10 tíma svefn á nóttu.

 

Mikilvægt er að fylgja því eftir að börn og unglingar fái nægan svefn. Í því felst m.a. að ganga úr skugga um að þau séu ekki í tölvunni þegar þau eiga að vera komin í rúmið.

Jónína Hrönn Símonardóttir Jónína Hrönn Símonardóttir | miðvikudagurinn 7. október 2020

Forvarnardagurinn 7. okt. 2020

Samvera fjölskyldunnar er lykilþáttur í forvörnum
Samvera fjölskyldunnar er lykilþáttur í forvörnum
1 af 2

Forvarnardagurinn var haldinn í 15. sinn í grunnskólum á Íslandi í dag. Markhópurinn er 9. bekkur - en í samkennslu græða allir, svo allt unglingastigið fékk  forvarnarfræðslu í dag. Þar kom fram að mikilvægi samveru með foreldrum/fjölskyldu ásamt íþrótta- og tómstundaiðkun eru verndandi þættir þegar kemur að neyslu unglinga á áfengi, tóbaki og vímuefnum. Hvert ár skiptir máli og heilinn er ekki nægilega þroskaður til að "taka á móti og vinna úr" þeim efnum sem finna má í áfengi og vímuefnum fyrr en við erum orðin 20 ára! Svo þess vegna segjum við: Hvert ár skiptir máli. Við horfðum saman á myndband þar sem forseti Íslands, sem jafnframt er verndari forvarnardagsins, gaf okkur góð ráð og var mjög hvetjandi. Sjá https://www.forvarnardagur.is/

Einnig ræddum við aðeins neyslu orku- og koffíndrykkja, en ný íslensk rannsókn sýnir að neysla nemenda í 8. og 10. bekkjum á Íslandi sé með því mesta sem gerist í heiminum. Neysla þessara drykkja hefur áhrif á svefn ungmennanna, sem aftur hefur áhrif á námsgetu og úthald. 
Sjá: https://www.mast.is/is/um-mast/utgefid-efni/skyrslur/neysla-ungmenna-a-orkudrykkjum-gefur-tilefni-til-adgerda

 

Heilbrigði, hollusta, nægur svefn, samvera með fjölskyldu, íþrótta- og tómstundaiðkun, allt eru þetta þættir sem stuðla að betri líðan barna og ungmenna. Og viljum við ekki alltaf gera allt sem best fyrir börnin okkar? Tökum spjallið og gerum eitthvað skemmtilegt og uppbyggilegt saman.

Erna Höskuldsdóttir Erna Höskuldsdóttir | þriðjudagurinn 6. október 2020

Ólympíuhlaupið

Miðvikudaginn 7. október ætlum við að hlaupa Ólympíuhlaupið. Hlaupið verður ræst kl. 11:00 frá kirkjunni. Allir fá ávexti eftir hlaup og fara svo sturtu. Skóli samkvæmt stundatöflu eftir hádegi.  Allir þurfa að koma með eða vera í íþróttafötum sem henta vel í útihlaup og hafa meðferðis handklæði, allir í sturtu eftir hlaup.

 

Vegalengdirnar eru 2,5 km fyrir yngstu nemendurnar

5 km og 10 km fyrir mið,-og elstastig (val)

Óskir um vegalengdir er einnig hægt að ræða og semja um við Sigþór (einstaklingsmiðun).

 

Nemendur sem ætla 10 km mega hlusta á tónlist á meðan þeir hlaupa kjósi þeir það og þurfa að hlaupa í vestum.

Allir eru velkomnir til að taka þátt í þessum viðburði með okkur, börnin á Laufás taka þátt.

 

Eitt helsta markmið ólympíuhlaupsins er að hvetja nemendur skólanna til þess að hreyfa sig reglulega og stuðla þannig að betri heilsu og vellíðan.Nánar má lesa um skólahlaupið á vef Í.S.Í. http://www.isi.is/fraedsla/olympiuhlaup-isi/

Erna Höskuldsdóttir Erna Höskuldsdóttir | mánudagurinn 5. október 2020

Upplýsingar varðandi Covid

https://www.heilsuvera.is/media/1567/hallo-eg-heiti-korona-ny-utgafa.pdf
https://www.heilsuvera.is/media/1567/hallo-eg-heiti-korona-ny-utgafa.pdf
Nú er alls staðar verið að herða sóttvarnir, eftirfarandi þætti verðum við í skólunum að hafa í huga:
  • Minnum stöðugt á 1 metra regluna á milli fullorðinna.
  • Við berum ábyrgð á okkar persónulegu sóttvörnum og aukum þrif.
  • Allir fullorðnir sem í skólana koma spritti hendur við komu og noti grímu verði ekki hægt að virða fjarlægðarmörk.
  • Foreldrar leikskólabarna komi eingöngu í fataklefa (minnum á spritt á veggnum þegar þið komið inn).
  • Skólaþjónustan mun halda áfram þannig að hver starfsmaður fari eingöngu í einn skóla á dag.
  • Ekki er grímuskylda í vinnu með börnum, kennarar geta valið að bera grímu í kennslu með elstu nemendunum
  • Fundir verði fjarfundir þar sem því verður við komið og grímuskylda er á fundum ef rými eru lítil og ekki hægt að virða fjarlægðarmörk.
  • Mælst er til þess að starfsfólk fari ekki á landsvæði þar sem nýgengi smita er hátt nema brýna nauðsyn beri til.

Með sóttvarnar kveðjum

Starfsfólk Heilsuleikskólans Laufás og Grunnskólans á Þingeyri

Erna Höskuldsdóttir Erna Höskuldsdóttir | föstudagurinn 2. október 2020

Gullskórinn 2020- Göngum í skólann

Elsta stig vann gullskóinn 2020-það vantar 2 nemendur í hópinn
Elsta stig vann gullskóinn 2020-það vantar 2 nemendur í hópinn
1 af 2

Í dag hlaut elsta stig gullskóinn 2020. Gullskórinn er viðurkenningar farandsbikar sem hópurinn vann í Göngum í skólann átakinu sem stóð í september. Allir nemendur og starfsfólk merktu þá daga sem þeir komu gangandi eða hjólandi í skólann. Allir dagar hvers námshóps voru taldir og fundið út meðaltal hvers hóps. Allir hópar stóðu sig mjög vel og það munaði ekki miklu á stigagjöfinni. Starfsmenn skólans mega taka sig á en nemendur "rústuðu" þeim í þessari keppni. Þeir starfsmenn sem hafa hjólað og gengið í vinnuna síðan í haust fengu samt klapp og lof í lófa fyrir dugnað.

 

Fyrir afhendingu fórum við yfir ýmsa þætti sem stiðja við það að velja virkan ferðamáta og hvers við þurfum að gæta. Við minntum á nauðsyn þess að vera með hjálm þegar við hjólum og að tími endurskinsmerkja sé hafinn. Nánari reglur um hjólreiðar er að finna á vef samgöngustofu

Erna Höskuldsdóttir Erna Höskuldsdóttir | miðvikudagurinn 30. september 2020

List fyrir alla

Annan föstudag í september var list fyrir alla. Nemendur sáu danssýningu og tóku þátt í vinnustofu í íþróttahúsinu. Á milli vinnustofa fóru hóparnir í sund. List fyrir alla er barnamenningarverkefni og er ætlað að velja og miðla listviðburðum til barna og ungmenna um land allt og jafna þannig aðgengi barna á grunnskólaaldri að fjölbreyttum og vönduðum listviðburðum óháð búsetu og efnahag. Höfuðáhersla er lögð á list fyrir börn og list með börnum.

 

Stefnt er að því að yfir tíu ára grunnskólagöngu veiti verkefnið börnum góða yfirsýn yfir vettvang lista. Nemendur kynnast fjölbreytileika listanna, íslenskum menningararfi og list frá ólíkum menningarheimum.

 

Takk fyrir okkur Vala og Snædís þetta var mjög skemmtilegt og við nutum þess að hreyfa okkur saman og með ykkur. Nánari upplýsingar um verkefnið má finna á heimasíðu List fyrir alla

 

Kveðja frá dönsurunum:

Við viljum þakka kærlega fyrir frábæra viku hjá ykkur fyrir vestan. 

Þið og nemendur ykkar tókuð svo fallega á móti okkur sem og starfsfólk íþróttahúsanna. 
Það var frábært að hitta alla þessa nemendur og dansara. 

Framtíðin er svo sannarlega björt á Vestfjörðum. 

Gangi ykkur áfram vel með alla ykkar fallegu vinnu.

Sendum dansandi kærar kveðjur,

Vala og Snædís.

Erna Höskuldsdóttir Erna Höskuldsdóttir | mánudagurinn 28. september 2020

Íþróttaskóli HSV

Stundaskrá H.S.V. Þjálfari: Sigþór Snorrason
Stundaskrá H.S.V. Þjálfari: Sigþór Snorrason

Íþróttaskóli HSV hefst mánudaginn 05. október á Þingeyri og stendur yfir fram að jólafríi.  Æfingar fara fram í íþróttahúsinu á Þingeyri.  Æfingarnar eru fyrir 1.-7. bekk grunnskólabarna og er þjálfari Sigþór Snorrason.
Skráning er hafin og fer fram hér https://hsv.felog.is/
Æfingarnar verða grunnþjálfun barna og unglinga ásamt boltaskóla hvar farið verður í til skiptist blak, fótbolta, handbolta og körfubolta ásamt öðrum boltaleikjum og æfingum.
Verð er kr. 2.900,-
Markmið íþróttaskóla HSV:
.    Fá sem allra flest börn til að iðka íþróttir
.    Að fyrstu kynni barna af íþróttaiðkun sé jákvæð
.    Að börn fái að kynnast sem flestum íþróttagreinum
.    Að auka gæði þjálfunar
.    Lækka kostnað heimila við íþróttaiðkun barna
.    Auka grunnþjálfunarhluta æfinga, almenna hreyfingu, hreyfiþroska og hreyfigetu


Ef það vakna einhverjar spurningar vinsamlegast hafið samband við Heiðar Birnir Torleifsson, yfirþjálfara íþróttaskóla HSV á póstfanginu ithrottaskoli@hsv.is

« 2024 »
« Mars »
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Könnunin

Valdir tenglar

Vefumsjón