Hópurinn við Dynjanda, séð út Arnarfjörðinn

Hópurinn við Dynjanda

Sýning um Gísla Súrson í Komedíuleikhúsinu í Haukadal

Nemendur voru duglegir að nýta íþróttahúsið og sundlaugina

Artic Fich tók mjög vel á móti okkur

Hákon sá um að fræða okkur um fiskeldið og umhverfið allt um kring

Laxinn sem við grilluðum um kvöldið

Laxinn smakkaðist afar vel og vakti mikla ánægju og áhuga

Upp á Sandafelli

Talað var um hvað loftið var ferskt og orka allt um kring

« 1 af 10 »

Síðusta vikan í apríl var sannarlega viðburðarrík sérstaklega hjá nemendum í 6.-8. bekk. Nemendur og kennarinn þeirra Sonja Elín hafa verið þátttakendur í þessu verkefni sl. 2 ár. Þema verkefnisins eru víkingar og markmiðin eru m.a. uppgötva ný tækifæri og hæfni í samskiptum, kynnast margbreytileikanum og umgangast alskonar manneskjur og læra að skilja hvert annað. Markmiðið er líka að kennarar tengist og læri af hvor öðrum.

Samstarfið við skólann hér á Þingeyri er við Kasseboella Freeschool í Danmörku og Kohtla-Jarve Maleca Basic School í Eistlandi. Mánudaginn 25. apríl komu 38 gestir í heimsókn til okkar hér á Þingeyri og tvöfaldaðist fjöldi nemenda og kennara í skólanum. Nemendur unnu að ýmsum  verkefnum og má þar helst nefna víkingasmiðju í Stefánsbúð, heimsókn í gömlu smiðjuna og leiksýning um Gísla Súrson í Haukadal. Einnig var farið í fjallgöngu, farið á hestbak, íþróttahúsið og sund og að lokum í hópferð að Dynjanda með heitt kakó, kleinur og harðfisk.

Til að gera svona heimsókn að veruleika er þátttaka foreldra og samfélagsins afar mikilvæg. Við erum stolt og þakklát af samfélaginu sem Grunnskólinn á Þingeyri er partur af. Án ykkar hefði þetta ekki verið hægt! Orðatiltækið það tekur heilt þorp að ala upp barn á svo sannarlega við. Við erum mjög spennt fyrir tækifærunum sem okkar nemendur fá til að kynnast heiminum í þessu verkefni og sannfærð um að þau verði fleiri.

Stemninguna má sjá á meðfylgjandi myndum hér til hliðar

Páskabingó "á sal"

Samheldni, gleði (vinnum með gildi skólans og æfum okkur)

Mikill spenningur í loftinu

Nemendur í 2.-5. bekk máluðu hænuegg

« 1 af 4 »

8. apríl er síðasti skóladagur fyrir páskaleyfi. Í morgun hélt nemendaráð hið árlega páskabingó sem allir nemendur og starfsfólk skólans spiluðu "á sal".

Þeir sem unnu bingó fengu páskagotterí og hinir sem ekki voru eins heppnir reyndu að samgleðjast samnemendum sínum.

Eigið notalega páska í vonandi góðu veðri. Skólinn hefst aftur eftir páskaleyfi þriðjudaginn 19. apríl kl. 8:10 samkvæmt stundaskrá

Leiskólabörnin á Laufási komu fram á fyrri sýningunni (Brúum bilið)

Emilar á yngsta stigi (1.-3. bekkur)

Vorsöngur Ídu (hluti nemenda í 4.-6. bekk)

Anton og Alma á leiðinni með Emil til læknis (4.-5. bekkur)

Emil búin að draga Idu upp í fánastöngina

6.-10. bekkur lokalag

« 1 af 6 »

Árshátíðin sem haldin var 31. mars sl. heppnaðist mjög vel. Eins og mörgum er kunnugt settu nemendur og kennarar upp skemmtun/leiksýningu um Emil í Kattholti og skammastrik hans. Nemendur stóðu sig afar vel og hafa fengið mörg hrós fyrir vel unnið verk úr öllum áttum. Margir þurftu virkilega að stíga út fyrir þæginda ramma sinn og gera sitt besta til að skila sínu. Með því að æfa og koma fram á sviði þjálfast mismunandi hæfni sem ekki þjálfast í skólastofunni. Kennarar eru stoltir af nemendum sínum og þakka þeim fyrir frábæra sýningar. Í mörg horn þarf að líta þegar sýning er sett upp og öll hlutverk mikilvæg hvort sem þau sjást á sviði eða eru unnin í undirbúningi eða baksviðs.

Við þökkum leikskólabörnunum fyrir fallegan söng og tjáningu á morgunsýningunni.

Við þökkum gestum okkar kærlega fyrir komuna, það kom okkur mest á óvart að setið var í öllum sætum á morgunsýningunni (það hefur ekki gerst áður).

Þema á árshátíð er Emil í Kattholti (auglýsing eftir Jóhann 5. bekk)

Árshátíðarsýning G.Þ. verður í Félagsheimilinu á Þingeyri fimmtudaginn 31. mars

Fyrri sýning kl. 10

Þá munu börn í leikskólanum Laufás koma fram og syngja.

Seinni sýning kl. 19:30

Allir eru velkomnir að gleðjast með okkur.

Aðgangseyri er 2000 kr. fyrir 18 ára og eldri sem rennur í nemendasjóð.

(Dagskráin tekur rúma 1 og hálfa klst.).

Það verður sjoppa í hléi á seinni sýningunni til styrktar ferðasjóðs 9.-10. bekkjar.

Sigurvegarar undankeppninnar, á myndina vantar Möndu Ævarsdóttur

Flottir fulltrúar

Lukas Slatkevicius

Anita Teresa Snorradóttir

Nanna Björg Halldórsdóttir

Mateusz W. Russ

Þrymur Rafn Andersen

Tómas Valur Þór Bjarkason

« 1 af 8 »

Í dag, fimmtudaginn 24. mars, var loksins hægt að halda undankeppni Stóru upplestrarkeppninnar. Veður setti strik í reikninginn þegar halda átti hana í síðustu viku - en í dag var bongóblíða og við gátum farið á Suðureyri, þar sem undakeppnin var haldin í ár. "Litlu skólarnir" halda sameiginlega undakeppni til að velja fulltrúa skólanna þriggja, á Þingeyri, Flateyri og Suðureyri og skiptast á að halda undankeppnina og bjóða hinum til sín. Eins og fyrr segir var komið að Suðureyri og við fórum þangað í morgun, keppendur í 7. bekk og 6. bekkur til að sjá hvernig þetta virkar, því á næsta ári verða þau í þessum sporum. Við Guðrún Snæbjörg vorum einkabílstjórar. 

Krakkarnir okkar stóðu sig vel - og samtals voru 13 nemendur að lesa, en veikindi settu strik í reikninginn og ekki gátu allir verið með sem ætluðu að vera með. En svona er víst lífið.

Þriggja manna dómnefnd komst að því að 5 nemendur skyldu fara áfram í lokakeppnina sem haldin verður í Hömrum á Ísafirði 5. apríl næst komandi, en þar keppa nemendur úr öllum skólunum á norðanverðum Vestfjörðum.

Þeir sem dómnefndin valdi voru:

Lukas Slatkevicius og Þrymur Rafn Andersen úr G.Þ. 

Vigdís Eva Leifsdóttir Blöndal, Manda Malinda Ævarsdóttir og Arnór Smári Aðalsteinsson úr G.S. 

Varamaðurinn kom svo líka frá okkur, en það er Tómas Valur Þór Bjarkason.

En þó aðeins fáir séu útvaldir er oft mjög mikill sigur fólginn í því að sigra sjálfan sig og standa fyrir framan alla og lesa upp. Í mínum augum eru þau öll sigurvegarar og ég var mjög stolt af þessum flottu krökkum okkar.

Mælum með að lesa bækurnar um Emil

Árshátíð G.Þ. verður haldin 31. mars nk. Í undirbúningi verður skólahald með öðruvísi sniði þar sem kennslustundir verða nýttar fyrir leikæfiingar, söngæfingar og fleira er við kemur t.d. sviðsmynd. Hefðbundin stundaskrá getur raskast en stefnt er að því að allir hópar fari samt í íþróttir.

Við ætlum að hugsa stórt að þessu sinni og leika öll leikrit um hinn bráðsnjalla og sniðuga strák Emil í Kattholti sem flestir þekkja.

Umsjónarkennarar hvers hóps velja í hlutverk og sjá um æfingar. Þegar leikarar verða komnir með handrit er mjög sniðugt að nota það í heimalestri til að æfa og læra línurnar sínar.

Nánari tímasetningar fyrir árshátíð verða auglýstar þegar nær dregur.

Svona er spáin um hádegisbil 23. febrúar 2022

Appelsínugul viðvörun er í gildi samkvæmt veðurspá í fyrramálið 23. febrúar til miðnættis. Skólahald í öllum skólum Ísafjarðabæjar hefur verið fellt niður í samráði við sviðstjóra. 

Nýjar reglur um skólahald þegar óveður geysar voru samþykktar í bæjarráði í síðustu viku, þar segir:

Krakkarnir skoðuðu græjurnar og fræddust um störf slökkviliðs og sjúkraflutingsmanna.

« 1 af 6 »

Í dag, 11. febrúar, er 112 dagurinn. Af því tilefni fengum við heimsókn í skólann. Slökkviliðsbíllinn og sjúkrabíllinn mættu á svæðið með sírenum og látum. Það hafði tilætluð áhrif og spenntir krakkar hópuðust að þeim til að skoða græjurnar og fræðast um bílana og störf þeirra viðbragðsaðila sem starfa hjá slökkviliði og á sjúkrabíl.

Krakkarnir fengu að setjast inn í bílana og ýta á einhverja spennandi takka og allir bæði skemmtu sér og fræddust um leið. Kærar þakkir Hákon, Níels og Dannir fyrir að koma til okkar og sýna krökkunum græjurnar sem viðbragðsaðilar hjá slökkviliði og sjúkrabílum nota þegar við þurfum á hjálp að halda. Þó 112 dagurinn sé dagurinn í dag, getum við alltaf hringt í 112 og þá er gott að vita að viðbragðsaðilar koma okkur til hjálpar.

Beðið eftir hinu óvænta - náttfata og bangsadagur

Nemendaráð bauð í bíó og safa

« 1 af 2 »

Nemendaráð stóð fyrir skemmtilegri uppákomu í skólanum í dag. Þau höfðu lagt það til að allir mættu í náttfötum eða kósýgalla og mættu hafa bangsa með í skólann í dag. Það mæltist vel fyrir hjá nemendum og kennurum - og gaman að sjá hvað margir tóku þátt í því. Þau voru síðan með óvænta uppákomu á sal þegar þau buðu öllum í bíó og leiki - og allir fengu safa (sem er algjört sparinesti í G.Þ.). 

Það var ekki annað að sjá en að allir (a.m.k. langflestir) skemmtu sér vel og á nemendaráð hrós skilið fyrir að brjóta upp daginn fyrir okkur - nokkurs konar sárabót fyrir að ekki hefur enn verið hægt að halda Þorrablót vegna ýmissa ástæðna. En við vonum að Þorrablót eða Góugleði geti orðið hjá okkur - á Þorra eða Góu.

Bestu kveðjur héðan frá okkur í G.Þ. og eigið þið dásamlega helgi.

Nemendur og starfsfólk.

ATH!!!! Breyting á tímasetningu í bólusetninguna á morgun. Hún hefst kl. 13.30 - og foreldrar eiga að hafa fengið nýja tímasetningu í sms.

Bestu kveðjur, skólinn og heilsugæslan.