Kveikt var á Spádómskertinu á aðventukransinum á mánudaginn

2. desember skreytingardagur

• Skólinn skreyttur og komið í jólabúning
• Unnið á stöðvum í aldursblönduðum hópum
• Endilega að koma með heftara og auglýsingabæklinga til að endurvinna.

6. desember kveikt á 2. kertinu og sungið „á sal“

9. desember Tarzan-kl. 10-12 í íþróttahúsinu (Allir)

10. desember „Rauðurdagur“

• Allir mæta í einhverju rauðu í tilefni dagsins
• Heitt súkkulaði og smákökur (skipulag auglýst síðar)
• Nemendaráð heldur jólaball kl. 18-20 um kvöldið

13. desember kveikt á 3. kertinu og sungið „á sal“

14. desember Jólasund fyrir 1.-3. bekk. Nemendur þurfa að muna eftir sundtösku, það má hafa með sér dót að heiman (ekki byssur).

14. desember Fatasund hjá 4.-10. bekk-muna að hafa hrein föt með sér í sund. Þeir kennarar sem treysta sér til hvattir til að hafa sundfötin með.

16. desember Jólabíó (í boði nemendaráðs) & Jólamatur

Jólamatur mötuneytisins- þeir sem eru ekki í mat geta keypt máltíð á 550 kr. (nemendur koma með pening og greiða í skólanum).

Að öðru leyti er venjulegur skóli samkv. stundaskrá.

17. desember „Litlu jólin“ kl. 10-12:10

Nemendur mæta í skólann kl. 10 spariklædd með jólalegt nesti (t.d. gos, safa, smákökur, sælgæti) og lítinn pakka í pakkaskiptin (gjöf sem kostar ca. 1000 kr.). Endilega koma með lítið kerti til að búa til stemmningu upp í stofu.

Aðventusöngur og kveikt á 4 kerti á aðventukransinum okkar.

Dansað verður í kringum jólatréð, hver veit nema jólasveinar kíki í heimsókn eftir notalega stund upp í heimastofu hvers og eins með sínum umsjónarkennara.

Minnum alla á að lesa þó að það séu að koma jól- lestur er lykillinn að ævintýrum!

Sýnum hugrekki og góðvild.

Gleðilega aðventu

Skólinn byrjar aftur eftir jólaleyfi 4. janúar kl. 10

Mánudaginn 22. nóvember hefjast þemadagar í skólanum og standa til og með fimmtudeginum 25. nóv. Þemað að þessu sinni er: Loftslagsbreytingar: Til hvaða aðgerða getum við gripið?

Nemendur mæta í skólann kl. 8:10 að venju þessa daga en annað skipulag riðlast. Það verða ekki íþróttir og sund þessa daga og allir dagar hjá öllum hópum endar kl. 13:20. 

Það verður áhugavert að sjá niðurstöður nemenda og við hvetjum foreldra og forráðamenn til að halda uppi umræðum um loftslagsmál heima þessa daga.

Loftslagsbetrunar kveðjur til allra þarna úti frá G.Þ.

Í dag, þriðjudaginn 16. nóvember, var (og er) Dagur íslenskrar tungu.

Við flögguðum í tilefni dagsins og héldum upp á daginn með ýmsum hætti.

Aðal-afmælisbarninu Jónasi Hallgrímssyni voru gerð góð skil á öllum stigum með ýmsum hætti. Horft var á þetta skemmtilega myndband sem finna má á Youtube þar sem Jónas stekkur niður af stalli sínum og fær sér göngutúr í tilefni dagsins.

Einnig voru skoðuð og lesin ljóð eftir hann - og nokkur ljóð voru m.a.s. ort í tilefni dagsins.

Þess má geta að Dagur íslenskrar tungu markar upphaf undirbúnings Stóru upplestrarkeppninnar í 7. bekk (og 6. bekkur verður líka með að hluta) og Litlu upplestrarkeppninnar í 4. og 5. bekk. En báðar þessar "keppnir" lúta að því að keppast um að verða betri lesarar. Erum við ekki alltaf að keppast að við að verða betri í dag en í gær í sem flestu? Þar á meðal lestri.

Hér er alltaf líf og fjör og nóg að gerast hjá okkur.

Bleikir litir í bleika mynd (yngsta stig)

« 1 af 10 »

Það er aldeilis búið að vera mikið að gera í október. Bleikur dagur var haldin föstudaginn 15. október til að styðja við átakið bleikur október. Flestir nemendur komu í einhverju bleikur, bleikar myndir voru litaðar og nemendaráð bauð nemendum upp á bleika andlistmálningu. Þessi bleiki bjarmi lýsti upp skammdegið og stemmningin var skemmtileg þökk sé nemendaráðinu.

Göngum í skólann átakinu lauk. Keppnin um Gullskóinn var æsispennandi og þurfti að endurreikna úrslitin vegna réttlætiskenndar nemenda um notkun á rafrænum hlaupahjólum en nemendum fannst ekki sanngjarnt að þau teldu. Það varð því úr að Yngsta stig hlaut Gullskóinn 2021. Óskum við þeim til hamingju með titilinn og fá drengirnir á yngsta stigi að hafa gullskóinn í sinni stofu í allan vetur.

Elsta stig fór á Íþróttahátíðina í Bolungarvík-þar var mikið stuð og þökkum við fyrir okkur þar var skipulag til fyrirmyndar og allir okkar nemendur tóku þátt í einhverjum greinum, einni eða fleirum.

Fimm ára börnin á Laufási komu í tvær heimsóknir í október, spennan var gífurleg og gaman að segja frá því að í skólahóp á Laufási eru nú 7 börn. Skipulag þeirra heimsókna köllum við Brúum bilið sem verður reglulegt í allan vetur.

26. október komu til okkar tvær listakonu, þær Alda og Kristín, með listasmiðjuna Veður, fegurð og fjölbreytileiki. Einnig komu til okkar nemendur og kennarar frá Flateyri til að taka þátt í smiðjunni með okkur. Yngri hópurinn bjó til veðurtákn og rýndi í veðurkort. Eldri hópurinn vann verkefni um líffjölbreytileikann á norðurslóðum með litríkum óskafánum. 

Verkin voru hengd upp í Edinborgarhúsinu á föstudaginn og af því að það var vetrarfrí fór Sonja og tók það upp og ætlar að sýna á Facebook síðu skólans. Stemninguna má sjá á meðfylgjandi myndum og vertu velkominn nóvember.

Booooo

Nemendaráð G.Þ. er í hrekkjavöku stuði og ætlar að halda hrekkjavökuball föstudaginn 29. október kl. 16-18. Farið verður í leiki og dansað ásamt því að kjósa flottasta búninginn. Aðgangseyri er 350kr. fyrir þá sem koma í búning og 400 kr. fyrir þá sem koma ekki í búning. 

Hlökkum til að sjá ykkur
Kveðja Nemendaráð G.Þ.

Lýsum upp skammdegið með bleiku og sýnum stuðning

Fimmtudaginn 14. október er starfsdagur í skólanum. Þann dag hugar starfsfólk að innra mati, innleiðingu leiðsagnarnáms og undirbýr kennslu. Nemendur eru í fríi þennan dag. 

Föstudaginn 15. október verður bleikur dagur. Nýskipað nemendaráð ætlar að bjóða upp á bleika andlitsmálningu í fyrsta tímanum. Það verða bleikar breytingar um allan skólann og nemendur og starfsfólk hvatt til að mæta í einhverju bleiku og þeir sem vilja eru hvattir til að koma í bleiku frá toppi til táar. Bleikur dagur og bleikur október er vitundar vakning gegn krabbameini hjá kí um. Við tökum þátt til að sýna stuðning og samstöðu. Nemendaráðið hvetur alla til að mæta með góða skapið og í einhverju bleiku eins og áður sagði. Hér má lesa meira um bleikan október og verkefnið bleika slaufan.

Nemandinn veit hvar hann er staddur og hvert hann er að fara, og hann fær leiðsögn til að brúa bilið þar á milli

Markmiðið er að nemendur taki aukna ábyrgð á eigin námi og fagmennska kennara aukist

« 1 af 2 »

Á síðasta skólaári sóttu allir grunnskólar á norðanverðum Vestfjörðum um styrk til Sprotasjóðs til innleiðingar leiðsagnarnáms. Sprotasjóður er sameiginlegur sjóður fyrir leik-, grunn- og framhaldsskóla og styður við þróun og nýjungar í skólastarfi í samræmi við stefnu stjórnvalda og aðalnámskrá.  Rannsóknamiðstöð Háskólans á Akureyri (RHA) sér  um umsýslu Sprotasjóðs skv. samningi við Mennta- og menningarmálaráðuneytið. Skólarnir allir hlutu í sameiningu styrk upp á kr. 900.000 til verkefnisins, sem mun standa yfir á árunum 2021-2023.

Í Aðalnámskrá grunnskóla (2011) segir að leggja skuli áherslu á leiðsagnarmat (Formative assessment)  þar sem nemendur velta reglulega fyrir sér námi sínu með kennurum sínum til að nálgast eigin markmið í náminu og ákveða hvert skuli stefna. Segja má að hugmyndafræði leiðsagnarnáms sé rauði þráðurinn í gegnum Aðalnámskrá grunnskóla.   Shirley Clarke er enskur sérfræðingur sem hefur skrifað fjölda bóka um leiðsagnarmat eða leiðsagnarnám  (Assessment for learning)  og haldið erindi og námskeið viða um heim, m.a. hér á landi. Aðferðirnar byggir hún á niðurstöðum virtra rannsókna en þær eru þróaðar í samstarfi við starfandi kennara. Leiðsagnarnám hefur verið skilgreint á ýmsa vegu, en út frá áherslum Clarke má í stuttu máli segja að leiðsagnarnám sé námsmenning þar sem megináherslan er á nám nemenda, fremur en kennslu kennarans. Skólar sem fylgja aðferðafræðinni hafa náð mjög góðum framförum í námi. Það er markmið okkar að efla leiðsagnarnám í skólunum þar sem þunginn er nám nemandans fremur en matið.

Eftirtalin hugtök einkenna skólasamfélag þar sem leiðsagnarnám er haft að leiðarljósi:

Hugarfar: Við viljum efla vaxandi hugarfar (growth mindset) nemenda gagnvart námi sínu. Þegar nemendur tileinka sér vaxandi hugarfar þá vita þeir að framfarir nást með þrautseigju. Ef þeir telja að hæfileikar séu eingöngu meðfæddir og annað hvort geti þeir eða geti ekki, þá hafa þeir fastmótað hugarfar (fixed mindset).

Mistök: Mistök skapa tækifæri til að læra. Enginn þarf að skammast sín fyrir að gera mistök, því allir mestu snillingar heimsins hafa gert fjölda mistaka og lært af þeim. Ef nemandinn þarf ekkert að hafa fyrir náminu, þá er verkefnið sennilega of auðvelt og nemandinn lærir lítið eða ekkert.

Heilinn: Líkt og vöðvar, þá eflist heilinn þegar hann er notaður.

Markmið: Nemendur eru meðvitaðir um hvað þeir eiga að læra í hverri kennslustund, ekki bara hvað þeir eiga að gera. Þeir stefna að ákveðnu markmiði og vita hvar þeir eru staddir á leið sinni þangað og hvenær þeir hafa náð markmiðinu.

Viðmið: Skýr viðmið um árangur eru skilgreind í upphafi. Nemendur er meðvitaður um til hvers er ætlast og  hvað þeir þurfa að gera til þess á ná árangri.

Vinnubrögð: Nemendur vinna á fjölbreyttan og skapandi hátt og hafa ýmsa möguleika til að læra og sýna hvaða hæfni þeir hafa tileinkað sér. Þeir vinna ýmist einir, tveir og tveir eða í stærri hópum. Þeir skipta reglulega um samstarfsfélaga. Áhersla er lögð á meðvitund nemenda um eigið nám og að þeir beri ábyrgð á námi sínu í samræmi við þroska.

Endurgjöf: Kennarinn notar endurgjöf til þess að styðja nemendur í átt að námsmarkmiðum sínum. Í kennslustundum bendir kennarinn nemendunum reglulega á hvernig þeim gengur að ná markmiðum sínum og hvað þeir geta gert til að gera enn betur. Þannig geta nemendurnir strax nýtt endurgjöfina. Stundum getur endurgjöfin líka verið skrifleg Meginmarkmið með endurgjöf er alltaf að hjálpa nemendum til að ná markmiðum sínum. Nemendur gefa einnig hver öðrum endurgjöf út frá þeim viðmiðum sem hafa verið skilgreind, og nemendur meta sjálfir eigin vinnu. Áhersla er lögð á að kennarar nýti sér einnig þá endurgjöf sem þeir fá frá nemendum.

Námsfélagar/samráðsfélagar: Tveir og tveir nemendur ræða saman, ígrunda, svara saman spurningum, leysa verkefni  eða skiptast á hugmyndum í afmarkaðan tíma. Það hjálpar nemendum að orða hugsanir sínar og þeir læra hver af öðrum. Nemendur skipta reglulega um námsfélaga/samráðsfélaga.

Samræður: Engar hendur upp, allir með.  Kennarinn varpar reglulega fram spurningum, athugasemdum eða hugmyndum til að vekja áhuga og forvitni nemenda. Í stað þess að biðja nemendur um að rétta upp hönd dregur hann nafn þess sem segir frá, eftir að allir hafa fengið tíma til að hugsa. Þetta er gert svo allir  í hópnum glími við spurninguna sem lögð er fyrir en sumir bíði ekki bara eftir því að þeir sömu svari alltaf fyrir þá.

Nanna Kristín Christiansen hefur tekið að sér að vera leiðbeinandi skólanna í þessu innleiðingarferli. Hún er uppeldis- og menntunarfræðingur og hefur starfað á sviði menntamála í áratugi og gefið út nokkrar bækur, þ.á.m. bókina Leiðsagnarnám - Hvers vegna, hvernig, hvað? sem er nokkurs konar leiðarvísir kennara og skólastjórnenda varðandi leiðsagnarnám. Nanna hefur tekið saman kynningu á leiðsagnarnámi fyrir foreldra og má nálgast þá kynningu hér. 

« 1 af 17 »

Svo kom haustið og skyndilega veturinn. Sem betur fer náðum við góðu veðri þann 15. september til að hlaupa ólympíuhlaupið. Það eru orð að sanni að haustið er búið að vera heldur blaut þetta árið og veturinn skall á með trukki núna síðustu vikuna í september. 

Nemendur stóðu sig mjög vel í hlaupinu ásamt elstu tveimur hópunum á Heilsuleikskólanum Laufás. Nemendur höfðu um þrjár vegalengdir að velja 2,5 km, 5 km og 10 km. Samanlagðir km voru 236 með gestum og leikskóla. Vel gert og til hamingju með árangurinn. Margir nemendur stóðust markmið sín og bættu tíma sína verulega. Nemendur G.Þ. skelltu sér svo aðeins í sundlaugin og heitapottinn eftir hlaupið. 

Mjög ánægjuleg hlaupastund er liður af göngum í skólann ásamt hvattingu til hreyfingar hjá ÍSÍ

Dísa Sóley tók fullt af flottum myndum og má sjá brot af þeim hér til hliðar.