Sæl

Varðandi næstu daga:

- Byrjun skóladags:
- 1.-3.bekkur mætir kl 08:10
- 4.-7. bekkur mætir kl 08:20
- 8.-10.bekkur mætir kl 08:30
- Mjög mikilvægt að allir virði þennan tíma. Nemendur fara beint í sínar heimastofur. Heimastofa 8.-10.bekkjar færist niður og verður í "Ninnu" stofu. Nemendur í skólaakstri mæta á sama tíma, 8:10, þ.e. frá Múla og er skilað í GÞ. Svo kemur mið- og efsta stig saman.

- Fríminútur á yngsta stigi eru samkvæmt venju, kl 09:40, miðstigið fer kl 10:00. Efsta stigið er í sinni heimastofu í fríminútum.
- Hádegismatur verður samkvæmt eftirfarandi: yngsta stigið kl 12:10, miðstigið kl 12:30 og efsta stigið kl 12:45.
- Heimilisfræði fellur niður, en ég mun reyna að halda úti annarri verkgreinakennslu eins og kostur er. Áhugasvið og tómstund fellur niður, nemendur eru í heimastofum á þeim tímum.
- Einnig fellur niður öll kennsla í íþróttahúsi, semsagt íþróttir og sund. Kennsla fer fram í heimastofum eða úti.

- Breyting á stundaskrám:
- Yngsta stig er búið í skólanum alla daga kl 12:10, eftir hádegismat.
- 4.- 7.bekkur eru búnir í skólanum kl 13:20 alla daga.
- 8.-10.bekkur eru búnir í skólanum kl 14:00 alla daga.

- Vatnsbrunnum er lokað og verða nemendur að koma með vatnsbrúsa að heiman. Nemendur fá áfram ávexti en er skammtað af kennara.

- Ég minni á handþvott, oft á dag, með sápu. Spritt eru í stofum og er mikilvægt að nemendur séu sem mest sjálfbjarga í að þvo sér.

Einnig vil ég minna á mikilvægi þess að nemendur sem eru með kvef, hósta eða önnur flensueinkenni séu heima þangað til einkennin eru alveg horfin.

Við förum svona af stað út í vikuna, þangað til við fáum upplýsingar um annað. Það er mjög mikilvægt að fylgjast vel með tölvupóstum, heimasíðu skólans sem og fb-síðu.

En ég vil endilega benda á þessa frétt inn á ruv.is, af nemendum á yngsta stigi, algjörir snillingar :-) https://www.ruv.is/frett/laera-ad-raekta-graenmeti-i-skolum-fyrir-vestan

Með góðri kveðju,

Vegna aðstæðna munum við byrja kl 10:00 í fyrramálið. Starfsfólk þarf að undirbúa næstu daga eins og hægt er. Ég biðst afsökunar á því hversu seint ég læt ykkur vita, en það eru stöðugt að berast nýjar upplýsingar um skólahald frá Kennarasambandinu sem þarf að bregðast við. 

Tekin hefur verið sú ákvörðun að FRESTA Sólakaffi, þar til um hægjist í samfélaginu v/Covid-19. 

Þegar tímasetning verður komin, verður það auglýst, en búast má við að það verði í fyrsta lagi eftir páska, jafnvel síðar. 

Eins og hefur ekki farið fram hjá nokkrum manni, þá hefur ansi skæð "flensa" verið að skekja heiminn. Við höfum eftir fremsta megni gert okkar til koma í veg fyrir smit hér í GÞ. M.a. er spritt sýnilegt og við erum farin að skammta matinn, þetta er eitt af þeim þáttum sem Landlæknir hefur bent á til að koma í veg fyrir smit. 

Eftirfarandi upplýsingar eru fengnar af vef Heilsugæslunnar:

"Heimsfaraldur sjúkdóms sem engin lækning er til við og enginn hefur ónæmi fyrir, er alvarlegur. Ekki af því að í þessu tilviki sé sjúkdómurinn svo alvarlegur heldur vegna þess að svo margir geta veikst á sama tíma að það lami þjóðfélagið og geri okkur ókleift að sinna þeim 5% sem verða alvarlega veik. Þetta er ástæðan fyrir því að reynt er eftir fremsta megni að hefta útbreiðsluna og tefja hana."

Svo er ávallt gott að minna á mikilvægi handþvottar, með sápu og þið farið yfir það heima, rétt eins og við gerum hér í skólanum. 

Hér er jafnframt linkur á frétt á vefsíðu Stjórnarráðsins/Mennta- og menningarmálaráðuneytið. 

Kristjana einbeitt

Vandaður upplestur

Þátttakendurnir 12

« 1 af 3 »

Lokahátíð Stóru upplestrarkeppninnar fór fram í Hömrum á Ísafirði í gær.

Lokahátíðin er alltaf mjög hátíðleg og skemmtileg stund, þar sem afrakstur mikilla æfinga á upplestri er verðlaunaður. Þeir sem ná á lokahátíðina eru fulltrúar síns skóla og hafa þótt skara fram úr í sínum árgangi, sem er 7. bekkur. 

Stóra upplestrarkeppnin hefur verið árviss viðburður í 7. bekk í 24 ár - og hefur G.Þ. tekið þátt í a.m.k. 16 af þeim.

Verkefnið byrjar ár hvert á Degi íslenskrar tungu þann 16. nóvember og lýkur formlega með lokahátíð í héraði í mars.

Að þessu sinni lásu 12 lesarar frá Þingeyri, Suðureyri, Bolungarvík og Ísafirði brot úr sögunni Stormsker eftir Birki Blæ og ljóð eftir Jón úr Vör, ásamt ljóði að eigin vali. Dómarar voru 5 og þeirra beið virkilega erfitt verkefni - að raða niður í 3 efstu sætin. Grunnskólinn á Ísafirði átti sæti 2 og 3, en það voru þær Anna María Ragnarsdóttir (3. sæti) og Dagný Rut Davíðsdóttir (2. sæti). Jóhann Ingi Guðmundsson Grunnskólanum í Bolungarvík var í 1. sæti.

Kristjana Rögn Andersen las fyrir hönd okkar skóla og stóð sig mjög vel og við erum ákaflega stolt af henni :-)

Hér má sjá nokkrar myndir frá keppninni.

Skólinn okkar fékk áskorun frá Brekkuskóla á Akureyri að taka þátt í Krakkasvarinu sem er liður í Krakkafréttum.

Upptökur fóru fram í dag - og verður sýnt frá því í Krakkafréttum á morgun, fimmtudaginn 27. feb.

Endilega horfið :-)

Í tilefni dagsins var kötturinn sleginn úr tunnunni í tómstund í dag og fengu allir á mið- og yngsta stigi rúsínur og annað "hollt nammi". Einnig voru flestir í náttfötum í tilefni dagsins, en nemendaráð stóð fyrir náttfatadegi.

Alltaf gaman að brjóta upp hversdaginn.

« 1 af 10 »

Á miðvikudaginn var, fóru allir nemendur út í hádegistímanum og leiki með Kristínu Hörpu, Guðrúnu og Helga. Sjá myndir - mér skilst að allir hafi skemmt sér vel :-) 

Í síðustu viku kom Kómedíuleikhúsið til okkar og sýndi Iðunni og eplin. Mjög skemmtileg sýning og frábært tækifæri fyrir nemendur að sjá sýninguna, einnig fengu nemendur að prófa búninga. Sjá myndir :-)

Á mánudaginn er bolludagur, gott að muna eftir að koma með bollu í nesti :-) Nemendur í 8.-10. bekk fara yfir á Ísafjörð þar sem Elísabet Lorange listmeðferðarfræðingur tekur á móti þeim. Lagt verður af stað frá skólanum kl 8:10. Sigmundur mun fara á skólabílnum og Ninna á sínum bíl. Gert er ráð fyrir að nemendur fái að borða í grunnskólanum á Ísafirði og fari svo aftur heim um kl 13:00. Þá er skóladeginum lokið hjá þeim þegar heim er komið.

Á miðvikudaginn fara nemendur í 1. og 2. bekk í heimsókn í Laufás. En þar er náttfatadagur - allir að mæta í náttfötum :-) 

Með bestu kveðju og góða helgi

Í gær, sunnudaginn 16. febrúar, var Hallgrímur Sveinsson, bráðkvaddur. 

Hallgrímur var kennari og skólastjóri við GÞ til fjölda ára. Auk þess gaf hann út bækur undir merkjum Vestfirska forlagsins, sem hann átti og rak. 

Starfsfólk GÞ sendir innilegar samúðarkveðjur til aðstandenda Hallgríms og þakkar honum ánægjulega samfylgd. Minningin um mætan mann lifir. 

Hér má sjá hvernig spáin lítur kl 12:00, föstudaginn 14.febrúar

Á morgun, föstudaginn 14. febrúar, er spáð aftakaveðri á svæðinu. Ég mælist til þess að foreldrar haldi börnum heima ef þess er nokkur kostur. Gott væri ef þið létuð vita í dag, svo ég sé ekki að senda starfsfólk að óþörfu af stað í fyrramálið. 

Á föstudaginn, 14.febrúar, ætlum við að vera með tækjalausar fríminútur í skólanum - nemendur verða þá að finna sér eitthvað annað til dundurs en síma eða spjaldtölvur...

Nóg er til af spilum, taflborð, skotskífa o.fl.