Erna Höskuldsdóttir | fimmtudagurinn 18. september 2014
Tónlist fyrir alla
Tónlist fyrir alla kom og heimsótti skólann miðvikudagsmorguninn 17. september. Tónlist fyrir alla leitast við að bjóða upp á vandaða skólatónleika fyrir börn þar sem skemmtun og menntun haldast í hendur. Boðið er upp á fjölbreytta tónlist í hæsta gæðaflokki í flutningi atvinnutónlistarfólks. Upplifun barnanna af tónleikunum er lykilatriði og áhersla er lögð á að hún verði sem allra best.
Hópurinn sem heimsótti okkur að þessu sinni kallar sig TríóPa og samanstendur af söngvurunum Hallveigu Rúnarsdóttur sópran, Jóni Svavari Jósefssyni barítónsöngvara (sem margir könnuðust við sem meðalljón) og Hrönn Þráinsdóttur píanóleikara. Atriði úr Töfraflautu Mozarts voru á efnisskránni ásamt fleiri skemmtilegum lögum. Gestirnir voru leikrænir með afbrigðum og við skemmtum okkur vel sem á horfðum. Elstu nemendur úr Leikskólanum Laufás komu með kennaranum sínum á tónleikana og ekki annað að sjá en að þau hefðu haft rosalega gaman af.